【自由副刊】劉靜娟／【台語時間】抾字紙

◎劉靜娟

一半擺看著彼个躼跤（lò-kha，腿長）先生咧抾（khioh，拾）紙枋（板）、飲料罐仔，我攏真感動。運動兼做環保義工，足好！伊應當超過七十歲，穿插整齊。

今仔日，李太太看著一个查某人提一寡仔紙枋予伊，竟然講，「何必錦上添花？」

請繼續往下閱讀...

我聽無，共（kā，把）家己厝內無路用的物件提來鬥陣做環保，也算錦上添花？

李太太講躼跤的抾紙枋、歹銅舊錫，是家己提去賣，毋是做志工。

「提去賣也真好啊，伊會當趁淡薄仔錢，閣予咱的環境較清氣。」

阮這个社區固定有宗教團體的人來回收紙類，毋過，看著一个睏佇公園內的遊民有咧抾簿仔紙，我嘛是會提厝內的報紙予伊。有一遍看著抾字紙的查某人對門頭前經過，我嘛是趕緊共拄好（剛好）欲囥（khǹg，放）入去樓梯跤的報紙、雜誌予伊，順紲共一疊紙枋提出來送伊；彼是一樓公司清出來的。按呢做應當無算「偷」才著；宗教團體固定四界去回收，抾字紙的人愈來愈歹賺食矣。

李太太講，「提去賣是無毋著啦，毋過這个人……」

伊講這个人毋是散赤人，兩翁仔某蹛（tuà，住）一間前後有空地仔的厝，遮爾好的地點，遮爾闊，竟然頭前後壁攏咧囤抾轉來的物件，連客廳都窒（that，塞）甲賰（tshun，剩）一條路仔通行！

有遮爾譀古（hàm-kóo，荒謬）的代誌？

李太太講，「著啊，我問伊厝內敢袂覕（bih，藏）鳥鼠，伊講袂。無鳥鼠，一定嘛有虼蚻（蟑螂），厝邊隔壁的人敢袂嫌？」

伊無侵占著外口的地，按呢做是伊的自由。不過，我好奇，既然是咧賣，哪會猶鎮甲規厝間？

「入的比出的較濟啊。」李太太講。

我講一定是伊共仝品類的物件集中，有一个數量矣，才規批賣出去；按呢，比沓沓滴滴、零零星星賣較好價。

真濟人抾拾（khioh-si̍p，惜物），毋甘共過時的、無路用的物件擲掉，甘願犧牲生活的品質；毋過，像躼跤的這款人，我猶是第一遍聽著。莫怪李太太想袂曉，「房間租出去的收入敢會輸抾字紙？」

空氣隨在人激，彼是伊的選擇。我講有這款認真、抾拾的人，對地球也是好事。伊做的可能比清潔人員做的閣較確實。

毋過，伊若來蹛我隔壁？莫較好。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法