【自由副刊】李長青／二十八號，佇二月

◎李長青

彼聲槍咧吼（háu）的聲

敢若（kánn-ná）已經真遠（hn̄g）

真遙遠（iâu-uán）啊……

．

我佇簿仔紙頂懸

斟酌看一个無完整的

標點，按怎予

新的目屎

．

添予滇。

．

佇二月，咱用安靜的面容

恬恬想彼條殕色的街仔路

．

槍的聲哭出來

遐爾清楚，親像佇我的耳空

爆炸，我的面龐，我的皮膚

我的頭鬃根，攏已經

攪做碎糊糊的喝（huah）聲

．

我佇樹蔭閃閃爍爍的公園

看著風吹，若落（lak）若飛

規个世界已經真遠（hn̄g），真遙遠（iâu-uán）啊……

請繼續往下閱讀...

風吹過的身軀

彼幅膽膽凝心的圖

遐爾稀微，已經拍毋見（phàng-kiàn）

原來的時間

．

原來的時間繼續流

繼續盪，繼續洗，佇二月

佇寒天抑未完全離開的今仔日

佇紛紛擾擾的路口

繼續認一張一張

黑白的相片，繼續讀

袂喘氣的

字，繼續共祈禱

寫做厚重的靈魂

．

我佇圖書館

目睭瞌（kheh）落來

．

恬恬聽

冷氣莊嚴的聲音

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法