【自由副刊】李敏勇／流亡、歸郷 － 紀念王育德前輩

◎李敏勇

JR山手線踅東京街頭的風景

鋪寫你人生的夢

戰前你佇東京帝國大學讀哲學

戰後猶原擱再去

你佇日本流亡編織台灣――苦悶的歷史

．

一九四七年出世的我

想像二二八事件離開故鄉的你

府城的凰凰花

每年熱天開甲紅帕帕

風若吹落佇你的心

．

你戴草帽的形影

佇查某囝明理的一首詩內面

你穿背廣（SeBiro）白色的襯衫（white shirt）

真紳士的大學教授

你嘛是獨立運動家

．

你啟蒙台灣青年

走找美麗國家的夢

無的確夢中你轉來過故鄉

我按呢想

徛佇你的墓園前心頭酸

．

有一年熱天

我佮家內以及前輩蔡桑去府上

從新橋駅到池袋駅

親像綴你的腳步

阮惦惦聽夫人講你的代誌

．

為著台灣新國度

為著福爾摩沙新歷史

漂泊的你倒轉來故鄉

你的靈魂會佇府城守護原本美麗的島嶼

你的文學你的台灣話文你的歷史論你的書房

．

每一年的熱天

鳳凰花會擱開

紅帕帕的花影滿滿是

照著育霖育德恁兄弟

落佇地面是恁作伙行踏的腳印

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法