【自由副刊】劉靜娟／【台語時間】 靠家己

◎劉靜娟

佇網路頂頭訂高鐵票，真方便；毋過，對網頂用信用卡無信心，納錢了閣愛佇車站櫃檯提票，我這个謹慎的老派人甘願加開十箍先去超商提票。手中有票，到時免緊張。

逐遍我攏拜託店員替我操作；因為免目睭瞪大大蕊看字，也免驚共人的機器舞甲當機去。有一日，店員可能較無耐心，那操作那講，「後擺你欲提票，就先點這个齒（key），紲落（suà-lo̍h，接下來）點遮；按呢，照伊的指示一步一步來，就完成提票的動作矣。真簡單！」

請繼續往下閱讀...

我乖乖頕頭，有一點仔歹勢；感覺家己佇這个查某囡仔的眼中是一个無科技常識的老歲仔人。伊的想法也無錯，我對科技產品一向膽膽（畏懼），佇外面的機器面頭前，尤其無愛予人看著家己跤手hân-bān（笨拙）。

無幾日，我閣佇網路訂高鐵票（我哪會無科技常識？早就會曉用網路訂票啊），欲去超商提票的時，想講毋知會拄（tú，遇）著仝一个店員無？若著予伊閣教我一遍，敢毋是真無面子？

隨想著，超商一四界，驚啥！我去另外一間較遠的；這遍，店員無叫我學。

經過半個月，我閣再需要去提票。入去超商，店員當無閒，我看機器邊仔也無人，免驚予人看著我笨跤笨手，就按呢大膽家己操作。想著二十外年前學電腦的時無信心，共家己講，「資訊室彼三十个操作員敢有可能全部比我較巧？」按呢想，真緊就學會曉矣。

這陣佇便利商店，我也鼓舞家己，「老罔老，敢一定比少年的較戇？」然後，先點這个齒，紲落點彼个，紲落拍身分證後四字、拍取票碼，照電腦的指示一步一步來，就好勢矣。

確實真簡單！無想欲靠別人，就袂困難啊。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法