【自由副刊】向陽／南方孤鳥 － 寫予屈原

◎向陽

汝企佇兩千三百年前的江邊

江中水湧攪吵汝不平的心

一路行來，上高山過溪埔

離開所愛的故鄉佮國都

一路行去，是茫霧的前途

宛然孤鳥，有樹無岫

汝的悲哀仝款無地安搭

攑頭看，蒼天渺茫

越頭望，烏雲重疊

憂加愁，是汝的姓汝的名

孤加單，是汝的運汝的命

汝是一隻孤鳥，喝咻到梢聲

．

汝行過兩千三百年前的江邊

面色青恂恂，目神綴風咧吹

天風冷冷冷，共汝寒到呿呿嗽

江水濁濁濁，魚仔蝦仔看攏無

汝毋願綴時行，參人彈仝調

汝無愛講白賊，啉酒練痟話

燕仔佇廟堂踅過來踅過去

鴟鴞的翅展開就是規片天

掠魚人問汝哪會落魄到這款地步

無言。滄浪之水若清，會當洗我的衫

無語。滄浪之水若濁，會當洗我的跤

汝是南方的孤鳥，有厝煞無路

．

南方的孤鳥，汝剖腹愛國家

佇戰國年代，秦國併吞的詭計進前

有話敢講，講楚國獨立的必要

忠直進言，言百姓生活的苦楚

汝是咬住木蘭花蕊的露水

早時講煞，暗時官位就被挽去

汝是無情風雨掃落塗跤的菊花

清氣身軀，予人踲踏到烏趖趖

汝是南方上蓋寂寞的孤鳥

夜深的時，汝的怨歎敢有人聽見

是愛佮鴟鴞佇天頂比翅雙飛

抑是欲佮雞仔佇籠仔內爭食

．

南方的孤鳥，汝終其尾飛入文學史

飛誠懸，汝的離騷是詩國上媠的花蕊

飛真遠，兩千外冬後我猶咧讀汝的詩

汝用楚國的話寫參中原無相仝的詩篇

寫巫靈、寫天國、寫幽都，寫出一部楚辭

汝坐踮飛龍駛的象牙車

提彩虹做七色旗，一路奏九歌

飛向西天，飛去彭咸住的居所

天風冷吱吱，國無人莫我知兮

江水白鑠鑠，又何懷乎故都

兩千三百冬後的暗暝

我佇離汝誠遠的台灣重讀汝的詩

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法