【自由副刊】劉靜娟／【台語時間】咱是文明的社會

◎劉靜娟

飯煮好，電鍋蓋掀起來，我隨鼻著一種怪怪的氣味。

我是好鼻獅，對氣味較敏感。

食的時，彼種氣味猶是真明顯；雖然彼包米並無過期。我的先生替伊辯護，講咱這兩、三個月攏食白米，一時袂慣勢胚芽米啦。我講，「進前嘛食真久的胚芽米，毋bat（曾）有這種氣味。」

請繼續往下閱讀...

無管啥物米，煮的時、掀起來的時，攏應當有米的芳味啊。坐佇客廳看冊，鼻著彼款幽微的芳味，就有一種單純的幸福。有時較「文青」，我甚至親像看著稻仔一大片的田呢。講起來，我也有做田人的DNA；阮的祖厝佇永靖鄉五汴頭，阿公、阿伯、叔伯阿兄一世人攏佇彼箍圍仔種作。

煮第二擺的時，我擲幾粒蒜頭入去；結果猶是無法度壓過彼款味。聽我直直嫌，先生講後遍莫買這牌的米就好啊。我講：「這包米會當食規個月，敢著食甲遐爾（hiah-nī，那麼）艱苦？我食著會反胃。」「按呢就莫愛啊。」

莫愛，擲掉？會予雷公摃。提去樓頂飼野鳥仔？一屑仔一屑仔飼，真費氣。

米是伊買的，叫伊去「申訴」，絕對無可能。叫我去，我嘛淡薄仔驚驚；kan-na（只）想著予人「考問」到底是啥物怪味，我就講袂清楚。萬一人予我歹面色，敢毋是真衰？

最後，決定穿整齊來去申訴――整齊，才較有氣勢？我拍算in（他們）的態度若無好，就規氣大方講我無愛矣。免經過我的手去處理，我就袂有壓力。我上向望的是，已經有人來做過仝款的反應。

我轉去厝的時，先生一秒鐘都無拍損，隨問我，「怎樣？」「怎樣？有人等欲算數（結帳），店員叫我米囥（khǹg，放）咧；我就按呢入去踅（se̍h，逛），出來的時，伊就共彼筆錢抵我買的物件矣。」

我心內歡喜，小小仔代誌會當證明咱是文明的社會，逐家有消費權益的觀念，人和人之間也互相會信任；這比錢退還我較重要。●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法