【自由副刊】李勤岸 詩二首

袂當絕望

．

日頭會使烏陰無出門

咱人袂使鬱卒出無門

．

月娘會使滿面全憂愁

咱袂使五彩雲拍結球

．

大山會當放咧直直崩

咱ê希望袂當小可放

．

大海會當hōo焦焦焦

咱袂當去hōo心枯焦

．

目屎會當流kah做水災

咱ê田袂當無有秧仔栽

．

咱會使失望親像路愈行愈遠

咱袂當絕望敢若天永遠袂光

．

失落ê海

－ 紀念林梵

．

你kā青春換做一片一片ê海湧

造一个咱失落ê海

你kā性命換做一塊一塊ê土片

鋪一个咱文學ê山河

．

有歲了後

你放hōo鬍鬚一直湠

湠做一座森林

Hōo你有厚度ê笑聲

化做一隻一隻ê尾蝶仔

飛tī開始開花ê

台灣文學ê森林

．

退休了後

你ê老鐵馬載你去四界巡狩

Tī人面冊

phoo台南人ê早頓

飼飽異鄉人枵餓ê思鄉

Phoo台灣俳句親像掖種

掖遍你關心ê土地

．

彼一工，大山崩落來

塗石流填落海

你長期清洗腰子ê海水

一時變kah足濁足濁

你性命ê海

雄雄失落去

海，雄雄失落

退去到咱看袂著ê

天邊ê彼條線

彼條線ê彼爿

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法